VILLON : ballade... filles... taverne...

« Car ou soies porteur de bulles,
Pipeur ou hasardeur de dez,
Tailleur de faulx coings et te brusles
Comme ceulx qui sont eschaudez,
Traitres parjurs, de foy vuidez ;
Soies larron, ravis ou pilles :
Ou en va l’acquest, que cuidez ?
Tout aux tavernes et aux filles.

« Ryme, raille, cymballe, luttes,
Comme fol, fainctif, ezhontez ;
Farce, broulle, joue des fleustes ;
Fais, es villes et es citez
Farces, jeux et moralitez ;
Gaigne au berlanc, au glic, aux quilles :
Aussi bien va, or escoutez !
Tout aux tavernes et aux filles.

« De tez ordures te reculles,
Laboure, fauche champs et prez,
Sers et pense chevaux et mulles,
S’aucunement tu n’es lettrez ;
Assez auras, se prens en grez.
Mais, se chanvre broyes ou tilles,
Ne tens ton labour qu’as ouvrez
Tout aux tavernes et aux filles ?

« Chausses, pourpoins esguilletez,
Robes, et toutes vos drappilles,
Ains que vous fassiez pis, portez
Tout aux tavernes et aux filles.

François Villon (1431-1463)
Œuvres poétiques Nouvelle Librairie de France Paris 1980

Illustration Brigitt Fleury